Südinsle abschlüsse

Community Highlights Oceania Südinsle abschlüsse

Lake Tekapo

Vo Cardrona us hani chli müesse vorwärts mache und bis Tekapo durefahre. 3h dur South Canterbury. So schön, dur all die goldige Hügel im Obigliecht z'fahre und immer wieder es Seeli mit dem prachtvoll blaue Wasser. E verruckt malerisches Farbespiel - woni aber niene aghalte han zum Föttele.

20240310_131943.jpg
20240309_192954.jpg
20240310_131737.jpg

Ich han en Ufenthalt i eim vode modernste Hostels ade hübschiste Lag, gad unmittelbar am Lake Tekapo vor mir gha. Spektakulär, das Haka House Hostel. E gueti Stimmig, überall netti Lüüt und total easy zum mit dene is Gspröch cho und chli philosophiere.

20240310_125508.jpg
20240309_193127.jpg
20240310_233106.jpg
20240310_191916_resized.jpg

S'Datum für die 2 Übernachtige hani tiptop planet gha: es isch Leermond und de Nachthimmel somit eso dunkel wie mögli. Tekapo isch s'erste (mittlerwile 2tgrösste) Dark Sky Reserve! Heisst, dass do allerlei astronomischi Forschig betriebe wird und me i dene sterneklare Nächt es wahnsinns Panorama am Himmel xeht. Fantastisch isch das xi.

20240310_133614.jpg
20240310_122057.jpg
20240310_205425.jpg

Ganz klar eis vo mine Highlights uf dere Reis: Stargazing incl. Hot Pools. Bide Tekapo Springs chame mit ihrem Stargazing Team und drü massive, fix installierte Teleskop go Sterne luege, dene Lüüt Löcher in Buuch froge und nocher i die heisse Bäder go de Nacke & Co entspanne etc.
SO, so lässig xi, das!!!

20240310_122845.jpg

Banks Peninsula

Es isch denn via Geraldine (döte isch dBarker's Factory, eini vo mine Lieblingsmarke wenns um Säuceli, Chutneys, Senf, Sirüpli und so wiiter goht) wiiter gange. Han mich döte natürli chräftig müesse duredegustiere zum g'chräftigt wieder wiiterfahre richtig Banks Peninsula.

20240311_115511.jpg

Säb isch eis vo mine Lieblingsörtli. Zwei erloscheni Vulkän bilded die grandios Landschaft, mitem Akaroa Harbour ide mitti und de Onawe Peninsula als 'Stöpsel' vo dem Kratersee, wo sich ufs offene Meer use öffnet.

20240313_135947.jpg

Tatsächli isches dasmol zur Abwechslig emol bewölkt xi. Ich bin zum 3te Mol do und han als Underkunft doch unbedingt müesse bi Cor und Margo verbii, wo letscht Johr de Michi und mir eso guet glueget hend. Die zwei hend e u Freud gha, dass sie do wiederkehrendi Chundschaft hend und sie hend mir es guets Priisli gmacht für eis vo ihrne mega herzige Zimmer im Halfmoon Cottage.

20240313_101615.jpg
20240313_101833_resized.jpg

Eifach hübsch döte! Sones charmants, alts Huus mit dem fantastische Garte rundume und spannende Gäst wome i dere top igrichtete Chuchi oder em gmüetliche Esszimmer oder de Lounge atrifft. Verruckt heimelig, das Plätzli.

20240311_181959.jpg

Mir gfallt eifach das Akaroa! Die herzig Architektur vo all dene chliine, simple aber putzhübsche Hüüsli, s'einte Kafi wo sWC hinderem Büechergstell versteckt isch und so wiiter.

20240313_111035.jpg
20240313_111133.jpg
20240312_150847.jpg
20240312_142602.jpg

Uf dOnawe Peninsula chame usewandere - aber nu wenn nöd gad Fluet isch, denn stoht nämli de schmal Zuegang für paar Stund under Wasser. Ich bin döt usegspaziert und ha gwüsst, dasi mues vorwärts mache zum no trochenen Fuesses zrugg z'cho. Ehrlich, ich han dUssicht gnosse aber denn zünftig müesse seckle zum no im aller, allerletschte Moment uf sFestland übere z'cho. Super xi, han halt bitz müesse chlettere am Schluss aber dWanderschueh sind troche bliebe.

20240312_154601.jpg
20240312_154739.jpg
20240312_154453.jpg

Ide Barry's Bay Chäserei bini xi - die isch landeswiit würkli guet vertrette ide Läde. Han mi ordentlich duredegustiert, chli dene Chäser id Werkstatt glueget und mich mit de Verchaufsdame intensiv ustuuschet. Au ufem French Farm Wyguet bini xi und ide lokale Gin Distillery zAkaroa. Do chönnt ich mich ez wuchelang chli zwüsche de Büecherläde, Museeä und Lädeli vertue. D'Gastronomie isch do wunderbar und all das umgeh vo dere umwerfende Landschaft wome doch eso guet cha go wandere, segle und vilich sogar die superseltene Hector's Delfine xeh.

20240312_164516.jpg
20240313_123532.jpg
20240312_152513.jpg

Klar hani ufem Retourweg di lang Strecki über die verschiedene Kretene gwählt und bin uf dere hübsche Stross entlang zrugg richtig Christchurch gfahre.

20240313_135313.jpg
20240313_133251.jpg

Christchurch

So, ez chunnt's ebe langsam zEnd, das letschte, umfangriiche Obetüür. Ich bin in Christchurch zum New Brighton Beach füre gfahre (döt hets en Pier, ganz ähnlich wie im originale Brighton ide UK). Eimol zünftig näbedra i die Hot Pools go es letschts Mol alles go aständig ufweiche und entspanne, während me vom warme Wasser us di schön Ussicht am Strand uf sMeer use gnüsst.

20240314_085243.jpg

Denn sAuto go abgeh. Es het mir über di letschte Wuchene eweg wunderbar dienet. In Christchurch mached sie sich parat für de Sail GP und ich han zmitzt ide Stadt nomol e Brauerei gfunde für mich.

20240316_111215.jpg
20240316_102351.jpg

Usserdem bini in Botanische Garte gspaziert, döte hets en Parkplatz gad am Flüssli zue, ufem Parkplatz stoht am Philip (de kenni jo ebe vo Nelson her) sin Nissan Leaf und er het döt zwei Kayaks druf packt. Seeeehr cool! Bini also i gmüetlichem Tempo bitz dur das Christchurch durepaddlet. Isch richtig, richtig lässig xi.

20240315_124344.jpg
20240314_143807.jpg

Und en geniale Abschluss für dä Trip! Ziit zum in Flugi stiige und die Landschaft nomol vo obe z'bestuune.

Marlborogh Sounds vo obe:
20240316_143805.jpg

Direkt über de schneebedeckti Mount Ruapehu mit sim Kratersee (de Vulkan isch wieder bitz meh aktiv letschti):
20240316_150441.jpg

Zrugg uf Tauranga Moana woni find, isch eifach 'stupidly beautiful':
20240316_152328.jpg

This featured blog entry was written by DriftersTrace from the blog Studiere in Neuseeland.
Read comments or Subscribe

By DriftersTrace

Posted Sun, Mar 17, 2024 | Comments