Südwärts

Community Highlights Oceania Südwärts

Greymouth

Vo Nelson us bini bis Greymouth duregfahre, würkli nume zum döte go pfuuse bevor's de Westküste entlang wiiter richtig Süde goht. Keis einzigs Fötteli hani döt gschosse. Obwohl, s'wär e spannends Hostel xi zum dokumentiere: e ehemaligs Chloster! Ich han mich gfasst gmacht uf chli wüesters Wetter und di ruuch Westküste.

Tatsächlich wachemer am Morge zumne riese Radau uf: en Tornado zieht gad e Schneise dur Greymouth. Es git aber nur Schäde und kei Verletzti, aso alles okay.

20240304_131601.jpg

Franz Joseph

D'Fahrt goht wiiter. Es regnet - wie immer, wenn ich ade Westküste bin. In Hokitika gits en Kafistopp und Pancakes zum zMorge. D'Fahrt zieht sich und es isch schön, im Haka House in Franz Joseph azcho.
Dasch wieder eis vo dene neueröffnete Hostels. Putzmodern und gmüetlich.

Uf Franz Joseph goht me vor allem, zum de einti Gletscher go aluege. Ich han dä scho xeh und mues ez nöd vo nöchem go luege, wie viel weniger devo mittlerwile no übrig isch. Hübsch isches aber allemal.

20240305_102731.jpg

Au die Stops ade wilde Westküste entlang sind wunderhübsch.

20240304_112644.jpg
20240305_120749.jpg
20240305_112936.jpg
20240305_140121.jpg

Wanaka

Eifach immer schön, uf das Wanaka z'go. D'Hifahrt isch scho spektakulär. Am einte Endi vom Lake Wanaka entlang, denn en Abstecher zum Lake Hawea übere, überall das putzklare, tüüfblaue Wasser. So schön!
In Wanaka chame sich eso wunderbar vertue.

20240305_152347.jpg
20240305_151608.jpg
20240305_171255.jpg

De berüehmti Bomm chame go föttele - de arm Cheib isch vo irgend somne Vandale verrupft worde und ez fehled ihm di undere zwei Zwiig. Jänu, xeht chli lädiert us, isch aber immerno en Hübsche.

20240306_101619.jpg

Uf de Lavendel Farm bini xi. Au herzig. Und faszinierend, was die so alles us ihrem Lavendel herstelled. Git aso allerlei Beautyprodukt, Deko, Kunst und Kulinarisches, was sie eim i rauhe Menge i ihrem Shop zum probiere gend und zum Verchauf abüüted für dihei, als Gschenkli etc.

20240306_112752.jpg

Han gueti Erinnerige a das Wanaka. Zum Biispiil stoht das überdachte Bänkli no döt, woni im 2017 mit Fründe min Geburtstag gfiiret gha han, wo vo Hawea her überecho sind. Ich weiss no, ich han feini Schoggimuffins mit Kiwifruchtstückli für alli bache gha dozmol..!

20240305_171610.jpg

Queenstown

Ziit zum für 3 Tag zrugg uf das Queenstown fetze.
Döte findet das Johr sInterhash statt, also es internationals Klubtreffe vode Hash House Harriers. Sie nenned sich 'a drinking club with a running problem'. Underem Strich sind sie en SchnitzeljagdKlub vo Mitglieder wo gern mol eis über de Durst ine sürpflet.
Us de ganze Welt reised also tuusigi vo dene kurlige Lüüt a und hend eis Gaudi zäme. Ich kenn die Sorte jo guet, bin jo mittem OK befründet.

20240307_144021.jpg

Tatsächli xehni dAnnika und de Skinner scho bevor ich Queenstown erreiche (würkli per Zuefall!), de Carl isch au do und mir essed alli mitenand zMittag in Arrowtown. De Hauptorganisator isch de Jack. De gueti Herr isch ade letschte Wiehnacht näbet mir gsesse und au de Carl und dWendy kenni vode letschte Wiehnachtsfiir her.

20240307_210136.jpg

Alli hend irgendwo e Underkunft gfunde und ich triff bi mir im Hostel no paar meh. D'Hashers hend am Donnstig ihren Red Dress Run verastaltet: heisst, es hend sich ALLI i möglichst ästhetisch widerlichi roti Chleidli gschmisse (vor allem dManne) und hend so Queenstown unsicher gmacht mit ihrer Schnitzeljagd (inklusive Schifffahrt uf de legendäre Earnslaw).

20240308_202155.jpg

So chunnts, dass ich mit sämtliche Hasher in Usgang bin. Sie hend alli ihri Übernäme, so wie ide Pfadi. Ich gang also chli go tanze mit Boulder Holder, King Knob Rot, FeFiFoFum, Careless Cum Shot und em Richard Emerson. DEM Richard Emerson, vode grosse Emerson's Brauerei! E grossi Ehr. Er isch sines Zeiche Taub und somit bi so luuter Musig i grossem Vorteil - aber au so en schampar spannende Charakter zum sich underhalte.

20240307_234854.jpg

Frankton

En Vorort vo Queenstown isch Frankton. Döte hani natürli müesse bide Altitude Brauerei verbii, mich gründlich go duredegustiere. Sie liit gad bide Marina, wo allerlei Motorboot und Jetboats (spezielli Technik, lokali Erfindig) agleidt sind. Es het die brandneue, schwimmende Steghüüsli geh. Im einte gits lokale Wy zum degustiere, es Kafi im übernöchste und es Maleratelier es Tüürli wiiter. Ganz kuuhl, het mir aso gfalle.

20240308_150357.jpg
20240308_164238.jpg

Gibbston Valley

Im Gibbston Valley bini bim Peregrine Wyguet verbii. Ich kenn de Rep vo do (de Justin) und wil mir jo einigi vo dene Wy im Barrel Room verchaufed, hani doch husch uf es Tasting müesse inecho. D'Katie het mir wunderbar glueget, sämtlichi Wy im Agebot und zu jedem es Gschichtli gha.

20240309_115918.jpg
20240309_115908.jpg
20240309_121748.jpg

Ade gliiche Stross git's sGibbston Valley Resort, samt ere Chäserei und ihrem eigene Wyguet und allerlei feini Sächeli wo si i ihrem Lädeli abüüted. 'Türli hani husch müesse do ahalte.

20240309_124606.jpg

Wiiter dem Strössli entlang chunnt me bi Amisfield verbii. Selpferständli hani au do gschwind müesse verbii. Cheibe stylish, das ganze. Au vo do hend mir in Tauranga en Sauvignon Blanc im Offeusschank. Lohnt sich aso, churz verbiiz'cho.

20240309_130153.jpg

Cardrona

Denn zum Highlight vom Tag: Cardrona!
Me fahrt über die Bergchetti ine wo zwüsche Queenstown und Wanaka liit und am höchste Punkt findt me 3 (oder je noch Interesse natürli meh) Destinatione vo namhaftem Status:

1. S'alte, traditionsriiche Cardrona Hotel.
Erbaut 1863 während de Goldgräberziite isch das alte Hotel nach wie vor beliebt während de Skisaison und im Summer brummt de Biergarte. D'Originalfassade het me so loh, de Rest isch renoviert.

20240309_135118.jpg

2. De berüchtigti Bra Fence.
Da chame wörtlich eso übersetze: tatsächlich werded a dem Haag sämtlichi BHs montiert. D'Lüüt halted a, stiiged us, fötteled und spended Geld is Kässeli vode NZ Breast Cancer Foundation oder stüüred en BH bi (oder e Kombination devo). Ich han uf all Fäll au min Biitrag gleistet und han mis Gstältli an Haag ghänkt. Tiiiptop.

20240309_140913.jpg

3. Cardrona Distillery.
Sone epischi Lag, cheibe hübsch ghalte, umgeh vo all dene Rosebüsch und putzmodern (eröffnet im 2015)! Do chönnti ez würkli Lang verzelle und debii wotti doch ez fertig werde mit dem cheibe Blog...
Mir serviered im Barrel Room sämtlichi (fascht alli) vo dene exklusive Tröpfli wo do destilliert werded. Unverschämt schöni Produkt, meisterhafts Marketing und maximali Authentizität!

20240309_150925.jpg
20240309_144556.jpg
20240309_141934.jpg

Ich han vor minere Abreis mittem Jonni gredt - er isch de Rep für Cardrona i üsere Region. Dur ihn bin ich zunere Gratistour cho inklusive Degustation! De absoluti Hammer, das!!!
Wunderbar kompetenti Lüüt hend üs dur das hübsche Awese gfüehrt, sind üs Red&Antwort gstande und hend üs zum Abschluss e wohri Gaumefreud bereitet mit all dene Müsterli.
So sind eifach eso, schwupps, paar Stund vergange..!

20240309_144638.jpg
20240309_161753.jpg
20240309_152249.jpg

This featured blog entry was written by DriftersTrace from the blog Studiere in Neuseeland.
Read comments or Subscribe

By DriftersTrace

Posted Sun, Mar 10, 2024 | Comments