Wasser

Community Highlights Oceania Wasser

Di letscht Wuche i minere aktuelle Wohnsituation a aller perfektischer Lag isch abroche! Am nöchste Mittwuch gohts denn los, und de Countdown lauft. Tatsächli isch jetzt scho s'letschte Wuchenend do und ich bin am packe, schaffe und demmoment halt am Blog schriibe.
Weni so dur mini Fötteli lueg, zeichnet sich enart echli es Thema ab - bin verruckt viel ufem Wasser xi!

20240131_110410.jpg

Ich bin am Tag noch Sailability mit de Rhonda (sie isch üsen Club Captain bi Sailability) und em Ian uf ihrere Yacht chli uf sMeer use. Hou isch das lässig xi! Mir sind zum Hafe us, um de Mount Maunganui ume, am Hauptstrand und de Inseli hinder mim Huus verbii, bitz de Küste entlang richtig Oste und wieder zrugg.

20240131_110856.jpg

Ihri Adijo isch es cheibe gmüetlichs Boot. Was mir zäme eis käfelet und zVieri schnabuliert hend - i dere Hitz. Die zwei sind unglaublich liebi Lüüt, bestens vernetzt und voller Gschichtli. Isch richtig schön zum sie chli usfroge, Segeltechnike dure go und eifach chli de Tag gnüsse.

Denn isch am Mäntig es volls Programm xi. Am Morge bini zum Stu gfahre. Au en Sailabilityveteran, aber vorwiegend zueständig für üsi Motorboot und de Underhalt vo allne Grät. Sit ewig und 3 Johr probieremer scho, es Datum z'finde, damit ich mol chan an Lake Karapiro mitcho, wo sich sini Familie trifft zum go Wasserskifahre. Ganz geil!

20240205_122948.jpg

Am Stu sini Familie isch super! Alli sind totali Wasserrattene und verdammt guet i allem, was mit Wasser z'tue het.
Ich han's also sofort au emol probiert.
Jesses, isch aso scho nöd eifach so gäbig gange :)

20240205_151211.jpg

Es liiret eim recht us, macht aber enorm Spass. Mir isch's bis z'letscht aber nie recht glunge zum hübsch chöne hinderem Boot her skiine. Saumässig schwirig zum uf dBei cho. Do hets bide andere natürli viiiel eleganter usxeh.

20240205_151351.jpg

De Zaine het demonstriert, wie das mit de Wasserski goht. De Ruben isch mittem Monoski über de Slalomparcours gfetzt und het denn sWakeboard montiert. D'Phoebe, ihres Zeiche Nationalspilerin im Underwasserpolo, fahrt mengmol Parallelslalom mit. Heisst, das am gliiche Boot zwei Skifahrer sind, wo sich konstant immer wieder überchrüzed. Boah.

20240205_122923.jpg

Mit ihre bini uf eine vode Bisquits (die runde Schluuchboot, wie do en Donut ufem Bild) und dJungs sind ufem See umegfetzt bises üs is Wasser gschmisse het. De Lake Karapiro isch uf 25km ufgstaut. Mir sind z7te (4 ufem Boot, 3 ufem Bisquit) chli am See entlang düset, ab Brugge gsprunge und ab em einte Fels is Wasser gumpet - de cheibe Fels isch fasch 10m höch xi!

20240205_151205.jpg

Mir hend uf all Fäll en guete zMittag verdient, bevor's wieder zrugg uf sWasser gange isch. De Stu het sin faltbare Wasserchocher debii gha und het uf sim Koffergrill e feini Rundi Kafi & Tee gchochet.

20240205_131709.jpg

D'Ladies hend allerlei Fressalie mitbrocht, selber bacheni Chüeche, Brownies etc. So hemmer alli öppis zum knabbere debii gha und hend de fantastisch sunnig Tag gnosse.

20240205_185032.jpg

Mir hend denn aber scho bald emol müesse ufbreche. Hejo, bis am 15:00 Uhr hemmer xeit, und säb isch doch scho bald e Stund her..! Ich bin uf all Fäll zum zNacht iglade xi - endli xehni sBarkers emol wieder! Gopf, dasch doch ez verruckt lang gange bis das endli mol klappet het!
D'Suzy het sich nöd lumpe lo und het prompt üses FlatSignatureDish gchochet: Lamb Shanks!!!

20240205_185435.jpg

Ma so fein!!! Es git ez eifach nüüüüüt bessers als die cheibe Lammhaxe mit dere verruckt guete Sauce, Gmües und Couscous! So schön xi, zum i das Huus zrugg z'go und natürlich zum chli mittem Oakley spiele.

20240205_183827.jpg

De chlii Monsieur fangt ez so langsam a babbele und wil er chürzlich Geburtstag gha het, schwümmt er regelrecht i sine Gschenkli. Er isch eifach en u herzige Bueb und wachst eim verruckt schnell as Herz.

IMG-20240208-WA0001.jpg

Denn isch dä Dunnstig de ersti Segelobig mit de WoW-Ladies agstande. Woman On Water het e Winterpause igleit gha und meldet sich ez wieder zrugg. Herrlich isch das xi! Mir sind zrugg uf de Crossfire mit wiitgehend de gliiche Crew:

20240208_191132.jpg

Sauglatt mit dene Ladies z'segle. Dasmol isch au am Ross sini Frau, dYo debii xi und er selber isch uf sim Boot umegchletteret und isch üs Red & Antwort gstande über üsi Taktik, sSegle generell, Tips & Tricks und wie er de Hafe, de Wind und dFluet liest wienes Buech.

20240208_191136.jpg

Und prompt, wo mir zrugg im Yachtklub xi sind und üs es phänomenals zNacht uftischt worde isch, hemmer doch scho wieder bide Siegerehrig de ersti Platz vom hütige Obig abgruumt! Het's sich also glohnt, dass mir üs eso is Züüg gleit hend:

20240208_191144.jpg

This featured blog entry was written by DriftersTrace from the blog Studiere in Neuseeland.
Read comments or Subscribe

By DriftersTrace

Posted Sat, Feb 10, 2024 | Comments